خديجة حبي الذي غادرني

#قصة_جميلة

أنا استاذ عربي متقاعد وبعد التقاعد صرت أكتب روايات وقصص والحمد لله أنا رجال محترم كتير..

ومرتب.. وأنيق كتير وبيتي متل الفل ومنظم كتير…

والحمدلله أولادي دارسين وكلهم ناجحين بحياتهم. وبشغلهم ….

أموري كلها تمام وتحت سيطرتي ورفاقي يحسدوني على حياتي المنظمة.

وقدرتي على السيطرة على كل أمور بيتي وحياتي وعلى اولادي يلي دايما بيجوا ليزورنا مع أني بضوج من ضجة أولادهم. وأنزعح من اتصالاتهم طول اليوم ليطمنوا علي أنا وأمهم..

والحمدلله الجيران كويسين وعلى طول بيبعتولنا أكلات طيبةو بيحبوا يسهروا عنا ..طبعا لأني شخصية قوية ومتحدث لبق وكاتب كمان….

ومرتي مامعها شهادات. وهي إنسانة بسيطة وطيبة وعلى نياتها
من فترة زوجتي مرضت وبعد أسبوع رحلت إلى دار البقاء..اطلعنا على الضيعة دفناها وضليت اسبوع ورجعت على البيت مع أن الأولاد طلبوا أني أضل عندهم بس ماوافقت وقلتلهم انو انا اموري تحت السيطرة وما حدا يخاف علي وانا راح اتفرغ لكتابة القصص..
رجعت على البيت قعدت شوي وناديت اغليلي قهوة واعطيني البيجاما ياخديجة ..بس بعد شوي واتذكرت انو مرتي ماتت رحت صرت نكش الخزانة على البيجامة مع أنها قدامي
فتت على المطبخ وصرت دور على قطرميز القهوة وكسرت قطرميزين بطريقي وغليت القهوة وفارت على الغاز.
ضاق خلقي حاولت اكتب رواية ماقدرت واتذكرت انو مرتي كانت تقعد جنبي وأغلب أفكار القصص كانت من عندها قررت روح برات البيت ما عرفت شو بدي ألبس لأن #خديجة كانت على طول هي تختارلي ماذا ألبس
بقيت  فترة على هذا الحال وحالتي من سيء لآسوء وخصوصا ان ماحدا اتصل يي من الأولاد متل قبل…..

ولا حدا من الجيران دق بابي أو أعطاني صحن أكل. .. عرفت ان مرتي كانت على طول اتود الجيران و كانت تبعتلهم سكبة. وانا يلي كنت مفكر انو عم يحترموها ويودوها منشان قيمتي انا حتى رفقاتي ماعاد دقولي منشان نقعد بالقهوة
من فترة أتعبت كتير اتصلت بابني اجا وجبلي الدكتور ونصحني انو لازم اخد دواء الضغط بمواعيدو
سألني ابني: شبك بابا ليش ماعم تاخد دواء الضغط ؟
انا: لانو امك نسيت تعطيني الدوا
ابني استغرب كتير وما كان يحكي ولا كلمة وحاول يغير الموضوع وقلي انا فايت اغليلك بابونج وساوي فنجان قهوة الي
انا: مافي مي امك نسيت متور المي شاغل واحترق
ابني فات على المطبخ وشاف الجلي والوسخ بابا شبك شو صاير معك ليش البيت هيك
ماشفت حالي إلا قمت من التخت ومسكت بايدو واخدتو على البرندا وانا عم ابكي وقلتلوا شوف الزريعات كيف ماتت لانو امك #خديجة نسيت تسقيهم…. وشوف القفص. كيف العصافير ماتو لانو امك #خديجة نسيت اتطعميهم ..شوف الكركبة شوف الوسخ بالبيت ..شو بدي احكي امك #خديجة نسيانة تطبخ. نسيانة اتنظف. نسيانة. تتصل باخواتي منشان يجوا يسهروا عندنا…. نسيانة اتقول لرفقاتي يمروا لعندي منشان ياخدوني على القهوة…نسيانة اتقول للجيران..يدقوا علي الباب….حتى راحت ونسيت اتقلكم اتصلوا وتعالوا اطمنوا على ابوكم …

وابني واقف جمدان وعيونو عم تبكي .وانا عم ابكي وأصرخ وقول ارجعي يا #خديجة. ارجعي لقلك اني انا كمان نسيت قلك اني انا بحبك.كتير واني ولاشي من دون خديجة
#مذكرات_استاذ_متقاعد #الشارع_العربي