التجسس النسوي
بقالى فتره شاكه ف جوزى ..وبفكر اراقبه بس مش عارفه اراقبه ازاى ولا اعمل ايه ؟
بقاله فتره بيتأخر بره البيت على غير عادته..كتير اتصل عليه ألاقي تليفونه انتظار
ساعات بقي بيغلط ف اسمى ..لغايه ما خلاص الشك بدأ يجننى
وفضلت افكر ف طريقه اراقبه بيها عشان اقفشه متلبس
المهم جاتنى فكرة
اشتريت نقاب من وراه واستنيته لما يخرج عشان اخرج وراه..خدت بنتى معايا عندها 5 سنين عشان مافيش حد يقعد معها
وعشان مايلحقش يهرب منى
المهم لقيته بيوقف تاكسي ..وقفت انا كمان تاكسي وجرينا وراه
بعد ربع ساعه نزل من التاكسي قومت نازله انا كمان
بعدين وهو رايح يركب عربيه تانيه تاه منى ..
لأن البت بنتى الشوز بتاعها وقع منها وفضلت تعيط
وانا لما جيت ابصلها ورجعت ابص عليه لقيته تاه .. فضلت ابص يمين وشمال بردو مش لاقياه
خلاص تاه منى
وفجأه….
لقيت حته قلم نازل على قفايا من شدته حسيت انى عينى نورت .. ولسانى دلدل ل بره
واذ به الشملول المعدول جوزى …فضل يقولى “انتى مين يابنت الكلب وخطفتى البنت دى منين ؟ “
ويشد البت منى … والبنت بنت العبيطه تعيط وتقوله إلحقنى يا بابا
وانا لابسه النقاب ومش عارفه اتكلم ولا انطق
وهو استحلاها وعمال يضرب ف اللى خلفونى … بالروسيه وبالشلاليط وبالقفا
والناس اتلمت .. ولا كأنهم مسكوا حرامى
وانا من كتر العياط والضرب اللى كلته من الناس..مش قادره افتح بؤى ولا قادره اشيل النقاب
كلت حته علقه ماكلهاش حمار ف مطلع والله يا جماعة …
المهم ربنا ساعدنى وقدرت اشد النقاب من على وشى
هو شافنى اتصدم… قالى ” ايه اللى عاملاه ف نفسك ده ياسعاد ” ؟
وانا اصووووت واقوله الحقني
لغايه ما فضل يمشى الناس ويقولهم حصل خير وسوء تفاهم يا جماعه واحنا آسفين دى مراتى وبنتى
المهم ….. فضل طول ماحنا راجعين ف السكه يضحك ويقولى
” بقي ياعبيطه بتراقبينى وانتى معاكى البنت ..؟ ” يعنى متآمر وأهبل ؟
المهم انى دلوقتى الشك لسا هيموتنى … واللى مزعلنى أكتر العلقه اللى كلتها ع الفاضى من غير ما اعرف هو بيروح فين؟
يبدو مدى تأثرها بالمدرسة التجسسية…
#مختارات_الشارع_العربي